ABŞ-nyň Arkanzas ştatynyň ýaşaýjysy "Powerball" lotereýasynda 1,817 milliard dollar utdy. ABC News teleýaýlymynyň habar bermegine görä, bu ABŞ-nyň lotereýa taryhyndaky ikinji iň uly utuşdyr.
Jekpoty anyklamak mümkinçiligi 292 milliondan bire deňdir. Ýeňiji öz biletini Roždestwo utuşy üçin satyn alypdyr we 4, 25, 31, 52 hem-de 59 sanlaryny saýlapdyr — sanlaryň hemmesi utuşly sanlar bilen gabat gelipdir.
Indi ýeňiji baýragy almagyň iki usulynyň birini saýlamaly: ýa-ha göni nagt görnüşinde 834,9 million dollar almaly, ýa-da tutuş puly 30 ýylyň dowamynda aýlyk tölegler görnüşinde bölekleýin almaly.
Bu utuş şu ýylyň dowamynda 1 milliard dollar çäginden geçen ikinji uly utuş boldy. Sentýabr aýynda "Powerball" lotereýasynyň iki petegi öz eýelerine 1,787 milliard dollar getiripdi we bu görkeziji amerikan lotereýa taryhynda üçünji orny eýeläpdi.
Lotereýa taryhyndaky absolýut rekord 2022-nji ýylda hasaba alyndy. Şonda Kaliforniýanyň ýaşaýjysy Edwin Kastro 2,04 milliard dollar utup, Ginnesiň rekordlar kitabyna girdi. Ol puluň 997,6 million dollaryny birbada nagt görnüşinde almagy saýlady. Kastro bir ýylyň dowamynda Los-Anjelesde birnäçe kaşaň jaýlary satyn aldy, olaryň iň gymmadynyň bahasy 47 million dollara deňdir.
