Hytaýyň "Unitree Robotics" kompaniýasynyň "G1" modelli alty sany adamşekilli (antropomorf) roboty aýdymçy Wan Lihunyň çykyşy wagtynda sinhronlykda (deň) öňe tarap salto aşyp görkezdiler. Gonkongyň "South China Morning Post" (SCMP) gazetiniň ýazmagyna görä, Çendu şäherinde geçen şüweleňde "Open Fire" aýdymy ýerine ýetirilende, robotlar tans toparynyň agzalary hökmünde çykyş etdiler.
Androidler elleriniň we aýaklarynyň çylşyrymly hereketlerini hem-de öwrümleri öz içine alýan doly derejeli horeografiýany görkezdiler. Robotlara kümüşsöw kurtkalar we gara balaklar geýdirildi. Çykyşyň wideoýazgysy sosial ulgamlarda giňden ýaýrady.
Hatda umman aňyrsyndaky bäsdeşleri - "Tesla" kompaniýasynyň ýolbaşçysy Ilon Mask hem bu wideony jogapsyz goýup bilmedi we özüniň "X" sahypasynda bu çykyşy "täsirli" diýip atlandyryp, paýlaşdy. Şondan soň bu wideo has-da uly meşhurlyga eýe boldy.
"Unitree Robotics" Hytaý Halk Respublikasynda robototehnika ugrunda öňdebaryjy işläp düzüji hasaplanýar. Şu aýyň içinde gurama android eýelerine özara maglumat alyşmaga we maşynlary okatmagyň täze algoritmlerini paýlaşmaga mümkinçilik berýän ýöriteleşdirilen goşundyny işe girizdi.
