Ispaniýanyň portundaky Fluvius Tavy uniwersal ýük gämisine dünýäde iň uly aerodinamik sorujy ýelkeni oturdyldy. Interesting Engineering neşiriniň ýazmagyna görä, bu tehnologiýa däp bolan ýelkenli çözgütlerden ýedi esse ýokary göterijilik güýjüni döredýär.
Işläp düzüji bound4blue kompaniýasy gurnama işleriniň tamamlanandygyny yglan etdi. 22 metrlik eSAIL enjamy öňünden işe doly taýýarlanylandygy sebäpli, Santanderdäki "Astander" gämi gurluşyk zawodynda ony gurnamak işleri gysga wagtyň içinde (bir gezekde) amala aşyryldy.
Gämini Niderlandlaryň Amasus Shipping kompaniýasy dolandyrýar we bu olar üçin şeýle görnüşli ikinji taslamadyr. Mundan ozal, şuňa meňzeş 17 metrlik sütünler Eems Traveller ýük gämisine hem gurnalypdy.
Bu ulgam ekipažyň gatnaşmagy bolmazdan, öwüsýän ýeliň ugruna we güýjüne görä doly awtonom ýagdaýda işleýär. Onuň iş prinsipi howa akymyny ýörite optimizirlenen üstüň boýuna sorup çekmek arkaly durnukly aerodinamik güýç döretmäge esaslanýar.
Bu tehnologiýa DNV klassifikasiýa jemgyýeti tarapyndan sertifikatlaşdyryldy we eýýäm Odfjell hem-de Eastern Pacific Shipping ýaly iri operatorlar tarapyndan ulanylýar. Şeýle desgalaryň ornaşdyrylmagy ýangyç sarp edilişini ep-esli tygşytlamaga we atmosfera goýberilýän zyýanly zyňyndylary azaltmaga kömek edýär.
