Aziýanyň futbol konfederasiýasy (AFC) Milletler ligasynyň – milli ýygyndylar üçin täze yzygiderli ýaryşyň döredilendigini yglan etdi. Bu barada 21-nji dekabrda Kuala-Lumpurda habar berildi.
Ýaryş FIFA-nyň halkara penjiresinde geçiriler. Esasy maksat oýunlaryň derejesini ýokarlandyrmak, senenamany has kesgitli etmek we logistika hem maliýe çykdajylaryny azaltmakdyr. Ýaryşyň formaty, möhleti we düzgünleri entek işlenilýär, ýaryşyň takyk başlanýan senesi hem kesgitlenmedik.
AFC-nyň baş sekretary Datuk Seri Windzor Jon Milletler ligasynyň guramanyň 47 agzasynyň ählisi üçin durnukly ösüş strategiýasynyň bir bölegi boljakdygyny belledi. Pikir sebit federasiýalary bilen maslahatlaşmalardan we seljermeden soň tassyklandy. Ýaryş global futbol senenamasyna üýtgeşme girizmezden, FIFA-nyň häzirki halkara penjiresiniň çäklerinde geçiriler.
Windzor Jonuň aýtmagyna görä, täze liga milli ýygyndylara deň derejeli garşydaşlar bilen oýnamaga, Aziýanyň Kubogy we dünýä çempionatynyň saýlama tapgyrlary ýaly uly ýaryşlara taýýarlyk görmäge mümkinçilik berer. AFC-nyň täjirçilik hyzmatdaşlary hem bu başlangyjy goldamak bilen, tomaşaçylaryň gyzyklanmalarynyň artmagyna we milli ýygyndylaryň media önüm hökmünde özüne çekijiliginiň ýokarlanmagyna garaşýar.
AFC täze Milletler ligasynyň bäsdeşlik deňagramlylygyny we ähli sebitler üçin ýokary hilli ýaryşlaryň elýeterliligini ýokarlandyrmaga gönükdirilen Aziýa futbolynyň uzak möhletleýin ösüş konsepsiýasyna laýyk gelýändigini belledi.
