ABŞ-nyň Pýudžet-Saund uniwersitetiniň fizikleri 2026-njy ýylyň dünýä çempionatynyň resmi topuny synap gördüler we onuň örän gyzykly aýratynlygyny ýüze çykardylar.
Adidas kompaniýasynyň ýasan «Trionda» atly täze topy çempionatyň taryhynda ilkinji 4 bölekden ybarat top bolar. Onuň dizaýny ýaryşy gurnaýan Kanada, ABŞ we Meksika ýurtlaryna bagyşlanyp taýýarlanyldy.
Alymlar topy ýörite şemally turbalarda we kompýuter programmalarynda barlap, öňki Dünýä çempionatlarynyň toplary bilen deňeşdirdiler. Netijede topuň örän güýçli depilen wagtynda howada tizligini çalt ýitirip, garaşylýan ýerine ýetmän, has ir aşak düşüp başlaýandygy belli boldy.
Fizik alym Jon Erik Goffuň aýtmagyna görä, topuň bu häsiýeti professional futbolçylary azda-kände ýalňyşdyryp biler. Sebäbi güýçli urlan urgulardan soň, top bellenen sepgidine (pas berilýän ýere ýa-da derwezä) birnäçe metr ýetmän galar. Mysal üçin, sekuntda 35 metr tizlikde barýan bu top, Katarda geçen dünýä çempionatynyň topuna garanyňda, takmynan 10 metr bärdäki ýere düşüp biler.
Şeýle-de bolsa, bu topuň gowy tarapy hem bar. Ol jerime urgularda ýa-da burçdan depilende adaty tizlikde (43 km/sag töweregi) howada örän durnukly uçýar we öňki toplar ýaly ugruny üýtgetmeýär. Bu bolsa derwezebanlara topuň nireden geljekdigini öňünden çaklamaga we ony aňsatlyk bilen tutmaga kömek eder.
Mundan başga-da, bu top diňe bir dizaýny däl, eýsem tehnologiýasy bilen hem tapawutlanýar. Onuň içine ýörite akylly çip gurnalandyr. Bu çip oýun wagtynda meýdançadaky maglumatlary derrew VAR ulgamyna we ofsaýdy anyklaýan kömekçi programmalara geçirip durar.
