Amerikan wideooýun işläp düzüjisi Electronic Arts-yň paýdarlary kompaniýanyň Saud Arabystanynyň Jemgyýetçilik maýa goýum gaznasynyň (PIF) ýolbaşçylygyndaky maýadarlar toparyna 55 mlrd dollara satylmagyny tassyklady diýip, Bloomberg habar berýär.
Baha her paý üçin 210 dollar bolar. Deňeşdirmek üçin: şertnama tassyklanan wagty paýnamalaryň bazar bahasy 203,79 dollar boldy, sentýabrda, şertnama yglan edilmezden ozal olar 175 dollardan geçmändi.
Saud gaznasyndan başga-da, alyjy hökmünde Silver Lake amerikan maýa goýum gaznasy we Affinity Partners kompaniýasy çykyş edýär. Soňkusy ABŞ-nyň Prezidenti Donald Trampyň giýewi Jared Kuşnere degişli.
Ylalaşygyň netijesinde Saud Arabystanynyň Jemgyýetçilik maýa goýum gaznasy EA-nyň paýnamalarynyň 93,4%-ini, Silver Lake 5,5%-ini, Affinity Partners 1,1%-ini alar.
Indiki tapgyr düzgünleşdiriji edaralardan rugsat almak bolar. EA tarapyndan sentýabrda yglan edilen şertnamanyň 2027-nji ýylyň birinji çärýeginde ýapylmagyna garaşylýar. Şondan soň kompaniýanyň adaty paýnamalary açyk bazarlarda söwdasyny bes eder.
Electronic Arts 1982-nji ýylda esaslandyryldy. Kompaniýa birnäçe sport oýunlary, şeýle hem The Sims oýny bilen bellidir.
