23-nji dekabrda Aşgabat wagty bilen sagat 06:13-de Günorta Koreýanyň Innospace hususy kompaniýasynyň raketasynyň ilkinji orbital uçurylyşy amala aşyryldy. Bu synanyşyk şowsuz tamamlandy: uçurylandan takmynan 30 sekunt soň raketa ýere gaçdy we bortundaky ähli ýük ýitirildi. Raketanyň bortunda koreý we hindi kompaniýalary tarapyndan taýýarlanan bäş sany kiçi hemra bardy.
Heläkçilik kiçi klasly, iki basgyçly Hanbit-Nano raketa göterijisi bilen bolup geçdi.
Innospace bazarda 2017-nji ýyldan bäri işläp gelýär, Günorta Koreýanyň özi bolsa kosmos senagatyny öz güýji bilen ösdürmäge ýaňy-ýakynda başlady. Milli Nuri raketa göterijisiniň ilkinji uçuşy 2021-nji ýylda amala aşyryldy, ýurduň KASA kosmos agentligi bolsa 2024-nji ýylyň awgustynda döredildi.
Uçuryş Braziliýanyň daşary ýurtly operatorlar üçin açyk bolan Alkantara kosmodromyndan amala aşyryldy. Raketanyň uzynlygy takmynan 20 metre golaýdy. Bar bolan maglumatlara görä, raketanyň bölekleri kosmodromyň çäginden daşary gaçdy, ýöne hiç hili zeper ýetmelere ýa-da adam pidalaryna sebäp bolmady.
Hanbit-Nano raketasynyň uçurylyşy tehniki sebäplere görä üç gezek yza süýşürilipdi. Bir ýyl mundan ozal kompaniýa "Hanbit-TLV" prototipiniň suborbital synaglaryny üstünlikli geçiripdi. Raketa 90 kg çenli ýüki Ýeriň aşaky orbitasyna we Gün bilen sinhron orbitasyna (500 km beýiklige çenli) çykarmak üçin niýetlenendir. Häzirki uçuryşda bolsa hemralary takmynan 300 km orbita çykarmak meýilleşdirilipdi.
Raketanyň birinji basgyjy suwuk kislorod we parafin bilen işleýän, 25 tonnalyk itekleýji güýje eýe bolan gibrid hereketlendiriji bilen üpjün edildi. Ikinji basgyç bolsa 3 tonnalyk itekleýji güýji bolan metan-kislorod hereketlendirijisi bilen işleýärdi. Deslapky maglumatlara görä, uçurylandan az wagt geçenden soň, birinji basgyçda ýangyn ýüze çykypdyr. Kompaniýa ähli maglumatlary seljerjekdigini we indiki uçurylyşa taýýarlyk görjekdigini mälim etdi.
