«Napoli» futbol boýunça Italiýanyň Superkubogynyň ýeňijisi boldy. Ol final oýnunda «Bolonýany» 2:0 hasabynda utdy. Ýaryş Saud Arabystanynda geçirildi.
Neapol klubunyň düzüminde iki goly hem Dawid Neres geçirdi (39-njy we 57-nji minutlar).
«Napoli» Superkubogyň üç gezek eýesi boldy. Ozal topar bu kubogy 1990-njy (şol wagt toparyň kapitany Diego Maradonady) we 2014-nji ýyllarda gazandy.
«Napoli» Superkubok ugrunda Italiýanyň çempionatynyň häzirki ýeňijisi hökmünde göreşdi. «Bolonýa» bolsa Kubokdaky ýeňşiniň netijesinde bu titul üçin oýna ilkinji gezek gatnaşdy.
Bir ýyl ozal Italiýanyň Superkubogyny finalda «Interi» 2:3 hasabynda utan «Milan» gazanypdy. Ýaryşda ýeňiş sany boýunça rekord «Ýuwentusa» degişli. Ol bu kubogyň 9 gezek eýesi boldy.
«Napoliniň» baş tälimçisi Antonio Konte üçin bu titul tälimçilik karýerasynda onunjy boldy. Ol 2024/25 möwsüminde klub bilen bilelikde Seriýa A-nyň çempiony boldy. Mundan öň Konte «Ýuwentus» bilen üç gezek Italiýanyň çempionatyny (2012-2014) utdy, «Çelsi» bilen Angliýanyň çempiony (2017) we «Inter» bilen Italiýanyň çempiony (2021) boldy. Şeýle-de, ol «Ýuwentus» bilen iki gezek Italiýanyň Superkubogynda ýeňiş gazandy (2012, 2013) we «Çelsi» bilen bir gezek Angliýanyň Kubogyny utdy (2018).
