Kia kompaniýasy ABŞ-nyň bazary üçin täze K4 hetçbeginiň bahalaryny yglan etdi. Satuwlary 2026-njy ýylda başlajak bu model üç sany komplektasiýada hödürlener. Awtoulag özüniň gönüden-göni bäsdeşleriniň birnäçesinden arzan bolmagy bilen bir hatarda, baý enjamlaşdyrylyşy bilen hem tapawutlanýar.
Hetçbegiň K4 EX diýlip atlandyrylýan başlangyç wersiýasynyň bahasy, 1195 dollarlyk eltip bermek çykdajysyny hasaba almanyňda, 24 890 dollar diýlip kesgitlendi. Bu baha sedanyňkydan has ýokarydyr, sebäbi hetçbek has ýönekeý LX we LXS wersiýalarynda hödürlenmeýär. Täze model Toyota Corolla Hatchback-den 710 dollar gymmat bolsa-da, Honda Civic Hatchback-den (2905 dollar) we Mazda 3 Hatchback-den (660 dollar) ep-esli arzandyr.
Orta derejeli GT-Line komplektasiýasynyň bahasy 25 890 dollardan, GT-Line Turbo wersiýasynyň bahasy bolsa 28 790 dollardan başlaýar. EX we GT-Line wersiýalary 147 at güýjüne eýe bolan 2,0 litrlik atmosferaly hereketlendiriji we wariator (CVT) bilen enjamlaşdyrylandyr. GT-Line Turbo bolsa 190 at güýjüni öndürýän 1,6 litrlik turbo hereketlendiriji we 8 basgançakly awtomatik geçiriji bilen üpjün edildi. GT-Line wersiýalarynyň ikisinde hem sport asma ulgamy bar.
K4 Hatch üçin özüne çekiji gyzyl-gara reňkli salon, ýokary hilli Harman Kardon ses ulgamy, sanly gurallar paneli we 12,3 dýuýmlyk ekranly multimediýa ulgamy elýeterlidir. Şeýle hem awtoulagda oturgyçlaryň şemalladylyşy, panoramaly kamera we elektron kömekçi ulgamlaryň giňeldilen toplumy bar.
