NASA-nyň Perseverance marsroweri birnäçe tehniki synaglardan üstünlikli geçdi we geljekki ýyllarda Marsda gözleg missiýasyny dowam etdirmäge taýýar. Bu barada Milli aeronawtika we kosmos giňişligini barlamak boýunça müdirlik (NASA) habar berdi.
Hünärmenler apparatyň esasy mehanizmleriniň abatlygyny tassykladylar, bu bolsa oňa Gyzyl planetanyň täze sebitlerini öwrenmek üçin ýene onlarça kilometr ýol geçmäge mümkinçilik berer.
Reaktiw hereket laboratoriýasynyň (JPL) inženerleri ulagyň kömekçi ulgamlaryna giňişleýin baha berdiler. Synaglaryň netijeleri tekerleriň öwrülme mehanizmleriniň resursynyň (iş ukybynyň) ýene azyndan 60 kilometr ýol geçmäge ýetjekdigini we apparatyň umumy ulanylyş möhletiniň azyndan 2031-nji ýyla çenli dowam edip biljekdigini görkezdi.
2021-nji ýylyň 18-nji fewralynda gonandan bäri, Perseverance roweri Ýezero kraterinde takmynan 40 kilometr ýol geçdi. Rower tiz wagtdan täze sebit bolan Lac de Charmes-e tarap ugrar. Alymlar ol ýerde gadymy mikrobial ýaşaýşyň bolmagy baradaky öňki maglumatlaryň üstüni ýetirjek dag jynslarynyň nusgalaryny tapmaga garaşýarlar. Awtonom nawigasiýa ulgamlary marsroweriň netijeli hereketini üpjün edip, oňa howpsuz ýollary özbaşdak saýlamaga we päsgelçiliklerden aýlanyp geçmäge mümkinçilik berýär.
