NASA-nyň Mars Reconnaissance Orbiter orbital enjamynyň bortuna gurnalan HiRISE (High Resolution Imaging Experiment) kamerasy Marsyň üstüniň 100 000-nji suratyny aldy.
Ýubileý surat missiýa başlanandan tas 20 ýyl soň düşürildi. HiRISE Marsyň üstüni jikme-jik öwrenmek üçin esasy gurallaryň biri bolmagynda galýar. Onuň kömegi bilen alymlar kraterleriň, çäge alaňlarynyň, buz çökündileriniň, şeýle-de geljekki kosmos enjamlaryny gondurmak üçin ulanylyp bilinjek ýerleriň ýokary hilli suratlaryny alýar.
Surat 7-nji oktýabrda düşürildi we häzir Perseverance enjamynyň işleýän Ýezero kraterinden, takmynan, 80 kilometr günorta-gündogarda ýerleşýän Uly Sirt sebitindäki tekizligi we alaňlary görkezýär. Alymlar ýel bilen ýokary göterilen çägäniň gelip çykyşyna we bu sebitde alaňlaryň döreýiş prosesine has gowy düşünmek üçin suraty seljerýär.
«Biz alaňlaryň ýeliň täsiri bilen nähili süýşýändigini, harsaňlaryň bolsa kert gaýalar boýunça nädip aşak düşýändigini gördük» — diýip, NASA-nyň Reaktiw hereket barlaghanasyndan Lesli Tampari aýtdy.
HiRISE diňe bir Gyzyl planetanyň üstüniň Ýerden näderejede tapawutlanýandygyny däl, eýsem onuň wagtyň geçmegi bilen nähili üýtgeýändigini görkezdi diýip, ol sözüniň üstüne goşdy.
