Nissan kompaniýasy sesiň ýaňlanyşyny sürüjiniň eşidiş aýratynlyklaryna görä sazlamak üçin niýetlenen mugt Personalized Sound programmasyny işe girizdi. Hyzmat Google built-in multimedia ulgamy bilen üpjün edilen Nissan we Infiniti awtomobilleriniň eýeleri üçin Google Play dükanynda elýeterli boldy diýip, kompaniýanyň metbugat gullugy habar berdi.
Hyzmatyň işi multimedia ulgamynyň ekranynda geçirilýän üç minutlyk eşidiş synagyna esaslanýar. Synagyň netijesi boýunça algoritm awtomatik taýdan 10 zolakly ekwalaýzeri 50-den 1200 Gs-e çenli ýygylyk diapazonynda sazlaýar.
Taslamany döretmek işi tas 18 aý wagt aldy we inženerleri hem-de eşidiş derejesi dürli bolan işgärleri, şol sanda eşitmek ukybyny kem-käsleýin ýitiren adamlary işe çekdi.
Programma adaty we premium audioulgamlar bilen gabat gelýär. Häzirki wersiýa sesiň Bluetooth we Spotify hem Audible ýaly gurnalan programmalaryň üsti bilen ýaňlanmagyny goldaýar. Funksiýa 2025-2026-njy ýyllaryň modellerine goşuldy. Olaryň arasynda Armada, Murano, Rogue, şeýle-de Infiniti QX80 we QX65 awtomobilleri bar.
Ulgam awtomobil açaryna ýa-da akkaunta baglanan birnäçe ses profilini saklap galmaga mümkinçilik berýär. Haçan-da ruluň başyna başga bir adam geçende, awtomatik taýdan onuň ses sazlamalary işjeňleşdirilýär. Içerki synaglaryň netijesine görä, ulanyjylaryň 96%-i şahsy sazlamalaryň işjeň ýagdaýda saklanmagyny makul bildi. Kompaniýa 2026-njy ýylda hyzmatyň funksiýalaryny giňeltmegi meýilleşdirýär.
