Portugaliýanyň Gran-prisi 2027-nji we 2028-nji ýyllarda «Formula-1» çempionatynyň senenamasyna gaýdyp geler. Degişli ikiýyllyk şertnama ýurduň hökümeti bilen baglaşyldy diýlip, patyşalyk ýaryşlarynyň resmi saýtynda habar berilýär.
Tapgyrlary Portiman şäherindäki «Algarwe» awtodromy kabul eder. Olar Zandwortdaky ýolda geçirilýän Niderlandlaryň Gran-prisiniň ornuny eýelär.
«Häzirki wagtda “Formula-1-i” geçirmäge bolan gyzyklanma we isleg öňkülerden has ýokary, şonuň üçin men premýer-ministr Luiş Montenegruwa, ykdysadyýet we territorial koordinasiýa ministri Manuel Kastro Almeýda, syýahatçylyk, söwda we hyzmatlar boýunça döwlet sekretary Pedru Maşaduwa, Turismo de Portugal-yň prezidenti Karlos Abadä, Algarwe syýahatçylyk assosiasiýasynyň prezidenti Andre Gomeşe we awtodromyň baş direktory we dolandyryş başlygy Haime Koşta “F-1-i” Portugaliýa gaýdyp getirmekde beren goldawlary üçin minnetdarlyk bildirýärin” – diýip, «Formula-1-iň» prezidenti we baş direktory Stefano Domenikali belledi.
Portimandaky awtodrom eýýäm 2020-nji we 2021-nji ýyllarda «Formula-1-iň» tapgyrlaryny kabul edipdi. Şol wagt çempionat koronawirus pandemiýasy sebäpli senenamany üýtgetdi. Iki ýaryşyň hem ýeňijisi şol wagt «Mersedesde» çykyş edýän ýedi gezek dünýä çempiony Lýuis Hemilton boldy.
2021-nji ýyldaky tapgyr britaniýaly sürüji üçin aýratyn boldy: bu ýeňiş onuň karýerasynda 92-nji bolup, utulan Gran-prileriň sany boýunça Mihael Şumaheriň rekordyny täzelemäge mümkinçilik berdi.
