Türkiýäniň Gaziantep şäherinde 16 ýaşa çenli türgenleriň arasynda türki dilli döwletleriň birinji küşt çempionaty tamamlandy. Türki döwletleriň guramasynyň howandarlygynda 13-nji dekabrda geçirilen ýaryşa Azerbaýjanuň, Gazagystanyň, Gyrgyzystanyň, Özbegistanyň, Türkmenistanyň ýygyndy toparlary we Türkiýeden üç topar gatnaşdy.
Türkmenistanyň ýygyndy topary ýaryşy bäşinji orunda tamamlady. Toparyň düzüminde Gurbanmyrat Rüstemow we Mähri Agamyradowa iň gowy netijeleri görkezdiler. Ýaryşyň netijelerine görä, Rüstemow özüniň halkara reýtingini 73,6 ballyk ýokarlandyrmagy başardy.
Umumy toparlaýyn hasapda Azerbaýjanyň ýygyndysy birinji orny eýeledi. Ikinji orna Özbegistanyň topary (goşmaça görkezijiler esasynda), üçünji orna bolsa Türkiýe-1 topary mynasyp boldy.
Çempionatyň çäklerinde türki dilli döwletleriň küşt federasiýalarynyň ýolbaşçylarynyň duşuşygy geçirildi. Türkmenistanyň wekili Türki küşt assosiasiýasyny döretmek meýilnamalaryna, hyzmatdaşlygy giňeltmäge, bilelikdäki ýaryşlary guramaga we sebitde çagalaryň hem-de ýetginjekleriň arasynda küşdi ösdürmäge degişli ara alyp maslahatlaşmalara gatnaşdy. Baş assambleýa hormatly myhmanlar, şol sanda Türki döwletleriň guramasynyň Baş sekretarynyň orunbasary hem gatnaşdy.
