Baýramdurdy Nurmuhammedow 71 kilograma çenli agram derejesinde boks boýunça dünýä çempionatynda Türkmenistana bürünç medal getirdi. Dubaýda geçirilen bu ýaryş dünýäniň iň güýçli türgenlerini jemläp, Halkara boks assosiasiýasynyň (IBA) howandarlygynda möwsümiň esasy wakalarynyň birine öwrüldi.
Ýarym final tapgyrynda türkmen boksçysy Russiýanyň wekili Sergeý Koldenkowdan utuldy.
Bu agram derejesiniň finalynda Koldenkow gazak türgeni Abilaýhan Žusupowdan ýeňildi.
Dubaýda geçirilen dünýä çempionaty diňe bir ýokary bäsdeşlik derejesi bilen däl, eýsem uly baýrak gaznasy bilen hem tapawutlandy. Baýrak gaznasynyň umumy möçberi 8,32 million amerikan dollaryna deň boldy. Her bir agram derejesinde ýeňijiler 300 müň dollar, kümüş medalyň eýeleri 150 müň dollar, bürünç medal gazananlar bolsa 75 müň dollar baýrak aldylar.
