15-nji dekabrda Prezident Serdar Berdimuhamedow Aşgabadyň Olimpiýa şäherçesiniň «Başa-baş söweş sungaty» sport toplumynda halkara sport ýaryşlarynda baýrakly orunlara mynasyp bolan ýaşlara hem-de olaryň tälimçilerine sylaglary gowşurdy. Bu barada “Watan” habarlar gepleşiginde habar berildi.
Dabaranyň barşynda wise-premýer B.Orazdurdyýewa Türkmenistanyň Prezidentiniň dünýä derejesindäki sport ýaryşlarynda baýrakly orunlara mynasyp bolan türgenleri hem-de olaryň tälimçilerini sylaglamak hakyndaky buýrugyny okady.
Prezident Serdar Berdimuhamedow baýrakly orunlara mynasyp bolan türgenlere hem-de olaryň tälimçilerine gymmat bahaly sowgatlary gowşurdy.
Dabaranyň barşynda döwlet Baştutany dürli abraýly halkara ýaryşlarynda we dünýä çempionatlarynda çykyş edip:
- III orna we bürünç medala mynasyp bolan türgenleriň her birine 40 000 (kyrk müň) manat möçberde pul baýragyny;
- II orunlary eýeläp, kümüş medallara mynasyp bolan türgenleriň her birine 70 000 (ýetmiş müň) manat möçberde pul baýragyny dabaraly ýagdaýda gowşurdy.
Türkmenistanyň Prezidenti dünýä derejeli ýaryşlarda kümüş hem-de bürünç medallara mynasyp bolan türgenleri taýýarlan tälimçileriň her birini 70 000 (ýetmiş müň) manat möçberde pul baýragy bilen sylaglady.
Dabaranyň esasy pursatynda Serdar Berdimuhamedow dünýä derejeli ýaryşlarda altyn medala mynasyp bolan türgenleri sylaglady. Döwlet Baştutany olaryň her birine 2025-nji ýylda goýberilen, ak reňkli «Toyota Camry HEV 2.5L» kysymly ýeňil awtoulagyň açaryny gowşurdy.
Şeýle hem dünýä derejeli ýaryşlarda altyn medala mynasyp bolan türgenleri taýýarlan tälimçileriň her birine-de 2025-nji ýylda goýberilen, ak reňkli «Toyota Camry HEV 2.5L» kysymly ýeňil awtoulagyň açarlary gowşuryldy.
