«Maklaren» toparynyň britaniýaly sürüjisi Lando Norris «Formula-1» möwsüminiň soňky tapgyrynyň – Abu-Dabiniň Gran-prisiniň jemi boýunça karýerasynda ilkinji gezek çempion boldy. Ýaryş ýekşenbe güni tamamlandy. Ýiti dartgynlylyk ahyryna çenli saklandy, çünki 2010-njy ýyldan bäri ilkinji gezek titula birbada üç gatnaşyjy dalaş etdi.
«Ýas-Marina» ýolunda geçen ýaryşyň özünde Norris tapgyryň ýeňijisi bolan Maks Werstappenden («Red Bull») we topardaşy Oskar Piastriden yza galyp, pellehana üçünji bolup geldi. Şeýle-de bolsa, üçünji orun we gazanylan utuk şahsy hasapda öňdebaryjylygy saklamak üçin ýeterlik boldy. Ahyrky Gran-priden öň britaniýaly sürüjisi Werstappenden 12 utuk öňde barýardy.
Möwsümiň jemi boýunça utuklar şeýle görnüşde paýlandy: Norris – 423 utuk, Werstappen – 421, Piastri – 410.
Mundan öň yzygider dört ýyl tituly gazanan Werstappen ýaryşlarda gazanan ýeňişleriniň sany boýunça möwsümde iň gowy netijäni görkezdi. Ol sekiz ýeňiş gazandy, ýöne bu çempionlygy goramak üçin ýeterlik bolmady.
«Maklareniň» sürüjisi soňky gezek 2008-nji ýylda «Formula-1-iň» çempiony bolupdy, şol wagt tituly Lýuis Hemilton aldy.
Şu ýyl Konstruktorlaryň kubogynda «Maklaren» topary möhletinden ir ýeňiji boldy (833 utuk), ikinji orny «Mersedes» (469), üçünji orny «Red Bull» (451) eýeledi.
