Toyota Tsusho (Toyota Toparynyň bir bölegi), teker öndüriji Yokohama Rubber we mototehnika öndürijisi Kawasaki Motors ýaly dokuz ýapon kompaniýasy ABŞ-nyň Prezidenti Donald Trampyň administrasiýasyna garşy kazyýete talap arzasyny ýazdylar. Olar 2025-nji ýylda ABŞ-da girizilen gümrük tölegleriniň doly yzyna gaýtarylmagyny gazanmak isleýärler, diýip Nikkei habarlar gullugy ýazýar.
Korporasiýalar ABŞ-nyň Ýokary Kazyýetiniň bu tölegleri bikanun hasaplamagyna garaşýarlar we tölenen serişdeleriň yzyna gaýtarylmagy barada göni karar çykarmagyna umyt baglaýarlar. Ozal aşaky federal kazyýetler Prezident Trampyň öz ygtyýarlyklaryny artdyryp, Kongresiň razylygy bolmazdan, sanksiýalary girizendigini eýýäm kesgitlediler. Ýokary Kazyýetde diňlenişik noýabr aýynda başlandy we ýylyň ahyryna çenli bu iş boýunça kararyň çykmagyna garaşylýar.
Täze talap arzasyna ABŞ-nyň iň uly dükanlar operatorlarynyň biri bolan Costco ýaly amerikan kompaniýalary hem goşuldy.
Administrasiýa 2025-nji ýylyň ýazynda has ýokary gümrük nyrhlaryny girizdi. Mysal üçin, ýapon harytlarynyň importyna 27,5% gümrük salgydy bellendi. Soň, 16-njy sentýabrda gümrük nyrhlary 15%-e çenli azaldyldy.
Hasaplamalara görä, Toyota, Honda we Nissan ýaly ýedi iri ýapon awtoulag öndürijisi maliýe ýylynyň birinji ýarymynda (aprel–sentýabr) gümrük nyrhlary sebäpli 9,7 milliard dollar ýitirdi. 2026-njy ýylyň martynda tamamlanýan tutuş maliýe ýylynda ýapon awtokonsernleri üçin umumy ýitgileriň 16,25 milliard dollara ýetmegine garaşylýar.
