Germaniýanyň Porsche awtoöndürijisi özüniň nusgawy sport awtomobilleriniň interýerinde ulanylan meşhur mata nagyşlarynyň önümçiligini gaýtadan dikeltdi. Indi assortimentde Pasha, Tartan we Pepita ýaly nagyşlar, şeýle-de beýleki özboluşly matalar bar.
Porsche-niň hakyky hilde gaýtadan döredilen dokma materiallary 356-dan 911-e çenli modelleriň eýelerine öz ulaglarynyň salonyny ilkibaşdaky ýagdaýyna getirmäge mümkinçilik berýär. Matalary Porsche-niň resmi diler merkezlerinde, şeýle-de Porsche Classic internet dükany arkaly sargyt edip bolýar.
Nagyşlary takyk gaýtadan dikeltmek üçin kompaniýa öz arhiwini we saklanyp galan seýrek nusgalary ulandy. Mysal üçin, hünärmenler ABŞ-da 1975-nji ýylyň 911 modeliniň gözenekli ýaşyl mata bilen örtülen, gowy ýagdaýda saklanan el degrilmedik oturgyjyny tapdy.
Beýleki hakyky bölek şaýlar ýaly, täze «köne» matalar öndürijiniň ýokary ülňülerine laýyk gelýändigini tassyklaýan birnäçe synagdan geçdi. Materiallaryň oda, ýagtylyga, reňke we sürtülmä garşy çydamlylygy barlandy. Bu bolsa olaryň salonyň dürli elementlerinde: oturgyçlaryň daşlyklarynda we gapdal panellerde ulanmak üçin laýyk gelýändigini aňladýar. Matalar sargyt etmek üçin 1,5 x 2 metr ölçegde hödürlenýär.
