Airbus awiakosmos korporasiýasy programma üpjünçiligi bilen bagly meseleleri çözmek üçin A320 uçarlar toparynyň "aglaba bölegini" yzyna çagyrýandygyny yglan etdi. Bu barada Reuters agentligi habar berýär.
Airbus awiakompaniýalara iberen beýanatynda programma üpjünçiliginiň indiki meýilleşdirilen uçuşdan öň çalşyrylmalydygyny tabşyrdy. Agentligiň pudakdaky çeşmeleri munuň dünýäniň uçar parkynyň ýarysynyň işini bökdejekdigini we birnäçe müň uçara degişli boljakdygyny çaklaýar. Reuters agentligi yzyna çagyryşyň ABŞ-da we beýleki ýurtlarda ýylyň iň işjeň syýahat ediljek dynç günlerinde uçuşlaryň ýatyrylmagyna we gijikdirilmegine sebäp bolup biljekdigini belleýär.
Airbus kompaniýasy ýakynda A320 uçarlary bilen baglanyşykly wakanyň güýçli Gün radiasiýasynyň uçuşy dolandyryş ulgamlarynyň işlemegi üçin möhüm bolan maglumatlara zyýan ýetirip biljekdigini görkezendigini aýtdy.
Çeşmäniň berýän maglumatyna görä, gürrüň 30-njy oktýabrda Meksikanyň Kankun şäherinden ABŞ-nyň Nýuark şäherine uçan JetBlue uçary bilen baglanyşykly waka barada barýar. JetBlue uçary uçuşy dolandyryş ulgamynda näsazlyk ýüze çykandan soň Florida ştatynyň Tampa şäherinde gyssagly gonuşy amala aşyrypdyr. Uçaryň barýan belentliginiň birden aşaklamagy sebäpli birnäçe ýolagçy şikes alypdyr.
Bu yzyna çagyryş Airbus kompaniýasynyň 55 ýyllyk taryhynda iň uly çagyryşyň biridir. Dürli awiakompaniýalarda takmynan 11 300 sany A320 uçar maşgalasyna degişli uçarlar hyzmat edýär, şol sanda 1987-nji ýylda ulanyşa girizilen flagman A320 modeliniň 6 440 sanysy bar. Airbus kompaniýasynyň beýanaty yglan eden wagtynda dünýäde takmynan 3 000 sany A320 uçarlary howadady.
