Airbus kompaniýasy wodorod ýangyjyna esaslanýan ZEROe ýolagçy uçarynyň uçuş möhletiniň yza süýşürilendigini habar berdi. Uçuş aralygy 1850 km bolan 100 orunlyk awialaýneriň uçuşy ilkibaşda 2035-nji ýyla meýilleşdirilipdi, häzir bolsa ol 2040 – 2045-nji ýyllara süýşürildi.
Şeýle çözgüdiň sebäbi taslamany durmuşa geçirmek üçin zerur bolan esasy tehnologiýalaryň doly derejede taýýar däldigi boldy. Bu, ilkinji nobatda, gaýtadan dikeldilýän energiýa çeşmelerinden öndürilýän we bug gazlarynyň zyňyndylaryny döretmeýän “ýaşyl” wodorodyň önümçiligi bilen baglanyşyklydyr.
Kompaniýa uçaryň bortunda wodorody saklamak we howpsuz ulanmak tehnologiýalarynyň täjirçilik ulanylyşy üçin heniz ýeterlik derejede ösen däldigini, şeýle-de “ýaşyl” wodorody öndürmek we howa menzillerine eltmek üçin zerur infrastrukturanyň ýokdugyny belleýär. Mundan başga-da, şeýle desgalaryň gurluşygy ep-esli maýa goýumlary we wagt talap edýär. Häzirki wagtda “ýaşyl” wodorodyň önümçiligi-de gymmat proses hasaplanýar.
Airbus kompaniýasy ZEROe taslamasyny maliýeleşdirmegini 25% azaltdy we A380-de wodorod ýangyç elementleriniň synagyny ýatyrdy. Tygşytlanan serişdeler adaty ýangyçda işleýän inçe fýuzelýažly uçarlaryň döredilmegine gönükdiriler. Bu uçarlar 2035-nji ýyla çenli A320neo modeliniň ornuny tutar.
Täze taslamanyň gijikdirilmegine garamazdan, Airbus henizem wodorody awiasiýany karbonsyzlaşdyrmak üçin esasy gural hasaplaýar, ýöne onuň köpçülikleýin ulanylyşy 2050-njy ýyldan ir bolmaz. Ýakyn ýyllarda awiasiýada zyňyndylary azaltmagyň esasy usuly ekologiýa taýdan arassa awiasiýa ýangyjyny (SAF) ulanmak bolar.
