Halkara futbol federasiýasy (FIFA) Saud ösüş gaznasy (SFD) bilen Ähtnama gol çekdi. Onuň çäklerinde ösüp barýan ýurtlara 1 mlrd dollara çenli ýeňillikli karz berler. Serişdeler stadionlaryň hem-de töweregindäki infrastrukturanyň gurluşygyna we durkuny täzelemek işlerine gönükdiriler diýip, FIFA-nyň resmi saýtyndaky habarda aýdylýar.
Sport global JIÖ-niň tas 2%-ini üpjün edýär, bu bolsa pudagy iş bilen üpjünçiligiň, syýahatçylygyň we jemgyýetçilik ösüşiniň möhüm hereketlendiriji güýjüne öwürýär. Bellenilişi ýaly, bütin dünýäde 211 sport assosiasiýasynyň bardygyna garamazdan, halkara derejeli sport desgalary bolan ýurtlar bilen şeýle infrastrukturasy bolmadyk ýurtlaryň arasyndaky tapawut örän uly bolmagynda galýar.
FIFA bilen SFD-niň hyzmatdaşlygy halkara ülňülerine laýyk gelýän döwrebap köpugurly sport desgalaryny taslamakda, maliýeleşdirmekde we gurmakda milli hökümetlere goldaw bermegi maksat edinýär. Bu desgalar jemgyýetçilik durmuşy, bilim we inklýuziwlik üçin merkez bolup hyzmat etmeli. FIFA-nyň belleýşi ýaly, şeýle taslamalaryň işe girizilmegi iş orunlaryny döreder, ýerli işewürlige itergi berer we sosial jebisligi berkider – ýaşlar aragatnaşyk, türgenleşik we ýaryşlar üçin howpsuz hem döwrebap giňişlige elýeterli bolar.
FIFA we SFD uzak möhletleýin ykdysady durnuklylygy we ýerli mümkinçilikleriň ösüşini üpjün edýän taslamalary durmuşa geçirmek üçin döwlet edaralary bilen işjeň hyzmatdaşlyk eder. Başlangyç beýleki ösüş edaralaryny, hususy maýadarlary we sebit hyzmatdaşlaryny çekmek üçin hem mehanizm bolup hyzmat eder.
