Xiaomi hytaý kompaniýasy elektrik awtoulaglaryna adaty tormoz tutma ýeterlik bolmadyk ýagdaýda ulagyň päsgelçiliklerden awtomatiki usulda aýlanyp geçmegine mümkinçilik berýän funksiýany goşdy. Öň ýokary tizlikde şeýle hereketi etmeklik hemme awtomatlaşdyrylan ulgamlara ynanylyp durlanokdy, ýöne Xiaomi bu çözgüdi seriýalaýyn çykarylýan awtoulaglara ornaşdyrmagy hödürlän ilkinji kompaniýalaryň biri boldy.
CarNewsChina-nyň habaryna görä, Xiaomi HAD Enhanced ulgamynyň täzelenmegi bortdaky işjeň howpsuzlygyň mümkinçiliklerini ep-esli giňeltdi. Indi awtomatiki tormoz tutuş öňe hereket edilende 1-den 135 km/sag-a çenli we yza hereket edilende 1-den 30 km/sag-a çenli tizlikde işleýär. Öň ulgam diňe 5 km/sag-dan ýokary tizlikde işläp başlaýardy, bu bolsa dar ýerde hereket edende amatsyzdy.
Kameralar we datçikler, goý ol diwar, haýat, sütün, pyýada, iki tigirli ulag ýa-da haýwan bolsun, tapawudy ýok, islendik hereketsiz obýekti çalt we takyk tanamagy öwrendiler.
Şeýle hem, sürüji tormoz basmaga ýetişmedik mahaly, pes tizlikde gazyň pedalyna tötänleýin basylmagynyň öňüni almak üçin gorag goşuldy. 80 km/sagat bilen 135 km/sagat aralygyndaky tizlikde barylýarka gyssagly tormoz tutmak ýeterlik bolmasa, awtoulag päsgelçilikden özbaşdak aýlanyp geçip bilýär. Şonda tormoz tutmak ileri tutulýar we yzygiderli aýlanyp geçilýän hereketleriň sany iki bilen çäklendirilýär. Sürüjiniň islendik hereketi awtoulaga doly gözegçiligi derrew yzyna berýär.
