Türkmenistanda Adwokatlaryň milli hünär assosiasiýasyny döretmek meselesi ara alnyp maslahatlaşylýar. Bu mowzuk 21-nji noýabrda Aşgabatda geçirilen we ýuridik kömek ulgamyny ösdürmäge hem-de adam hukuklaryny goramakda aklawçylaryň roluny güýçlendirmäge bagyşlanan tegelek stoluň merkezi meselesi boldy.
Bu çäräni Aşgabat şäheri Adwokatlar kollegiýasynyň Prezidiumy we BMG-niň Ösüş Maksatnamasy (BMGÖM) bilelikde gurady.
Maslahata Mejlisiň, Adalat ministrliginiň, kazyýet jemgyýetiniň, hukuk goraýjy edaralaryň we beýleki döwlet edaralarynyň wekilleri gatnaşdy. Gatnaşyjylaryň şeýle düzümi hukuk ulgamyny kämilleşdirmeklige bolan umumy gyzyklanmany nygtady. Taslama bilelikde maliýeleşdirmäni beren Beýik Britaniýanyň ilçihanasynyň orny hem aýratyn bellenildi.
Tegelek stol aklawçylaryň ornuny güýçlendirmäge we ilatyň dürli toparlary, şol sanda aýallar we maýyplygy bolan adamlar üçin kazyýet elýeterliligini giňeltmäge gönükdirilen bilelikdäki başlangyçlaryň netijelerini jemledi.
Görkezilen netijeleriň arasynda ýuridik jemgyýeti birleşdirmek üçin möhüm ädim hökmünde Adwokatlaryň milli hünär assosiasiýasyny döretmek boýunça Ýol kartasynyň işlenip düzülmegi; Raýatlara bütin ýurt boýunça ýuridik goldawy has çalt tapmaga kömek edýän Adwokatlar kollegiýasynyň döwrebap web-saýtynyň işe girizilmegi; Gorag hukugynyň kepilliklerini güýçlendirmek boýunça teklip edilýän maslahatlar bilen Jenaýat iş ýörediş kodeksiniň derňewiniň geçirilenligi bellenildi.
BMGÖM-iň hemişelik wekili Narine Saakýan gazanylan netijeleriň kanunyň hökmürowanlygyny ösdürmek we ýuridik kömek ulgamyny gowulandyrmak, ony ähli raýatlar üçin has elýeterli etmek boýunça işleri dowam etdirmek üçin möhümdigini nygtady.
Tegelek stol aklawçylar bilen döwlet edaralarynyň wekilleriniň arasynda açyk pikir alyşmalar üçin meýdança boldy we geljekki hyzmatdaşlyk üçin esas döretdi. Onuň esasy maksady Türkmenistanyň ýuridik kömek ulgamyny halkara standartlara laýyk getirmek we adam hukuklaryny goramagy güýçlendirmekdir.
