Huawei kompaniýasy 25-nji noýabrda Hytaýda görkeziljek Mate 80 hatarynyň smartfonlarynyň täze Outdoor Mode awtonom režimine eýe boljakdygyny habar berdi. Öndürijiniň maglumatlaryna görä, bu režimde geljekki flagman bir zarýadda 14 güne çenli işläp biler.
Outdoor Mode tebigatda – pyýada gezelençde, kempingde ýa-da işjeňligiň başga görnüşinde köp wagt geçirýän ulanyjylar üçin niýetlenýär. Ýokary energiýa tygşytlylygy netijesinde ulanyja zarýad derejesini hemişe yzarlamak gerek bolmaz, çünki smartfonyň iş wagty ep-esli uzalar.
Häzirlikçe Outdoor Mode režiminiň nähili işleýändigi belli däl. Bu barada giňişleýin maglumatlary tanyşdyrylyş wagty aýtmak wada berilýär. Huawei Central portalynyň maglumatlaryna görä, režim smartfonyň hemra we beýleki käbir funksiýalarynyň energiýa sarp edişini azaldar, bu bolsa pes temperaturalarda hem akkumulýatoryň durnukly işini üpjün eder.
Mate 80 hataryndan başga-da, Huawei eplenýän Mate X7 smartfonyny we MatePad Edge planşetini hödürlär.
