Huawei kompaniýasy tarapyndan işlenip düzülen HarmonyOS operasion ulgamynyň altynjy wersiýasy şu ýylyň oktýabr aýynda çykdy we eýýäm 27 milliondan gowrak ulanyjy toplady. Bu barada Hytaýyň tehnologiýa ägirdiniň statistikasyna salgylanýan South China Morning Post gazeti habar berýär.
Öz programma platformasyny ösdürmek Huawei üçin mejbury ädim boldy. Takmynan alty ýyl mundan ozal ABŞ tarapyndan girizilen sanksiýalar Huawei-iň Google tehnologiýalaryna we ekoulgamyna elýeterliligini çäklendirdi. Şondan bäri HarmonyOS öz auditoriýasyny we funksional mümkinçiliklerini yzygiderli giňeldip gelýär.
Kompaniýanyň maglumatlaryna görä, HarmonyOS ulgamynda işleýän 100 müňden gowrak täze enjam her gün işe girizilýär. Kompaniýanyň şahsy programma dükanyndan bolsa her gün 88 milliondan gowrak programma we täzelenme göçürilip alynýar. Bu görkezijiler HarmonyOS-y Hytaý bazarynda Android ulgamyna durnukly alternatiwa hökmünde kabul etmäge mümkinçilik berýär.
Ulgamyň bäşinji wersiýasy geçen ýylyň ahyrynda tanyşdyryldy, iýun aýynda bolsa işläp düzüjiler altynjy wersiýa elýeterlilik aldylar. Oktýabrda bolsa ol köpçülikleýin ulanyjylara hödürlendi. Huawei-iň wekilleri 27 millionlyk sepgidiň aşylmagyny platforma üçin "ýaşaýyş ukybynyň çäginden geçmek" hökmünde häsiýetlendirdiler.
Şol bir wagtyň özünde, kompaniýa tehnologik garaşsyzlygyň beýleki ugurlaryny hem ösdürýär. Hususan-da, Huawei mobil enjamlar we hasaplaýyş tizlendirijileri üçin Hytaýyň öz içinde öndürilip bilinjek şahsy çiplerini döretmäge girişdi. Mundan ozal kompaniýa bu maksatlar üçin Taýwanyň TSMC zawodynyň mümkinçiliklerinden peýdalanýardy, emma şu onýyllygyň başynda sanksiýalar sebäpli bu mümkinçilikden mahrum boldy.
