Alphabet we Google kompaniýalarynyň baş direktory Sundar Piçai BBC teleýaýlymyna beren interwýusynda emeli aň (EA) pudagynyň çalt ösmegi bilen bagly bolup biläýjek töwekgelçilikler barada gürrüň berdi.
Sundar Piçai eger EA bazary "köpürjik" derejesine ýetip, soňra ýarylsa, munuň her bir kompaniýa täsir etjekdigini belledi. Onuň sözlerine görä, häzirki wagtda bu ugra gönükdirilýän maýa goýumlarynyň möçberi "aşa köp". Eger-de bardy-geldi, emeli aňa bolan maýa goýumlar we gyzyklanmalar birden togtadylaýsa, onda netijeler agyr bolup biler.
Google-yň mümkin bolan çökgünligiň netijelerinden gaça durup biljekdigi baradaky soraga jogap berip, Sundar Piçai şeýle diýdi: "Meniň pikirimçe, biziňkini hem goşmak bilen, hiç bir kompaniýa goragly däl."
Şol bir wagtyň özünde, Piçai emeli aň tehnologiýalarynyň hakykatdanam özgerdiji häsiýete eýe bolandygyny nygtady.
Ol EA-ny Internet bilen deňeşdirdi: "Biz häzir Interneti ýatlap bileris. Elbetde, artykmaç maýa goýumlary köp boldy, ýöne hiç birimiz onuň ähmiýetine şübhelenmedik. Men EA bilen hem şonuň ýaly bolmagyna garaşýaryn. Ol bir wagtda hem rasional, hem-de irrasionallygyň elementlerini öz içine alýar," – diýip, Google-yň başlygy aýtdy.
