Huawei kompaniýasy Mate 80 hatarynyň 25-nji noýabrda hödürlenjekdigini resmi taýdan tassyklady. Şol gün kompaniýa Mate X7 eplenýän smartfonynyň täzelenen görnüşini hem görkezer.
Şeýle-de, kompaniýa ilkinji tizeri hödürledi – suratda iki uly tegelek bolup, ol Mate 80-iň kamera modulynyň dizaýnyny we yzky paneldäki magnit elementini ýatladýar. Ýöne tiz wagtdan Digital Chat Station insaýderiniň kömegi bilen internetde Mate 80, Mate 80 Pro, Mate 80 Pro Max we Mate 80 RS Master Edition modelleriniň has aýdyň suratlary peýda boldy.
Deslapky maglumatlara görä, smartfonlar täze, bir kristally Kirin 9030 ulgamyna geçer, 3D ýüzi tanamak ulgamyny we gaýtadan işlenen kamera modulyny alar. Uly wersiýalaryň 20 GB operatiw ýady hem-de işjeň sowadyş ulgamyny aljak görnüşleri-de bolup biler.
Digital Chat Station tarapyndan hödürlenen suratlar Mate 80 modelleriniň ählisiniň tekiz ekrana, 3D ýüzi tanamak ulgamyna we barmak yzynyň gapdal skanerine eýe boljakdygyny görkezýär. Adaty wersiýada we Pro modelde periskopik teleobýektiw bilen üçli kamera bolar. Mate 80 Pro Max-da we Mate 80 RS-de iki periskopik modully kwadrokamera oturdylar, şeýle-de Mate 80 RS wersiýasynyň 20 GB operatiw ýada eýe boljakdygy habar berilýär.
Eplenýän Mate X7 ulaldylan 7,95 dýuýmlyk 2K displeý, inçe UTG aýnasy, täzelenen kameralar we has sygymly akkumulýator bilen üpjün ediler. Obsidian Black we Cosmic Red ýaly täze reňkleriň hem bolmagyna garaşylýar. Öndüriji galan maglumatlary tanyşdyrylyş dabarasynda mälim eder.
