Agyr agramda öňki dünýä çempiony Entoni Joşua we amerikaly bloger hem boksçy Jeýk Pol 2025-nji ýylyň 19-njy dekabrynda resmi taýdan söweşer.
Ilkibaşda Pol ýeňil agramda WBA-nyň çempiony Jerwonta Dewis bilen duşuşmalydy. Şeýle-de, Raýan Garsiýa we Terens Krouford hem göz öňünde tutuldy.
Joşua 2024-nji ýylyň sentýabryndan bäri ringe çykanok. Ol karýerasynda dokuz çempionlyk söweşinde ýeňiş gazandy we 2012-nji ýyldaky Olimpiadanyň altyn medalynyň eýesidir.
Jeýk Pol geçenki söweşini iýunda geçirdi. Şol wagt ol emin agzalarynyň biragyzdan karara gelmeginde Hulio Sesar Çawes-kiçiden üstün çykdy.
Bilermenler Joşuanyň göwrüm we professional taýdan Poldan üstün gelýändigini belleýär: britaniýalynyň soňky söweşi 115 kg agramda geçdi, onuň boýy bolsa 198 sm. Pol 100 kg-den sähel agyr bolup, boýy 185 sm.
Joşuanyň promouteri Eddi Hirn ozal türgeni 2026-njy ýyla çenli ringe çykarmagy meýilleşdirmändigini aýtdy. Ýöne Pol bilen söweş 36 ýaşly öňki çempionyň gaýdyp gelmegi üçin gowy mümkinçilik bolup biler.
Şeýle-de bellesek, Pol uly auditoriýany özüne çekmegi başarýar. Onuň söweşlerden gazanýan umumy girdejisi 100 mln dollardan gowrak diýlip hasaplanýar. Bu mukdaryň tas ýarysy – takmynan, 40%-i oňa Maýk Taýson bilen söweşden geldi. Taýsonyň özi, takmynan, 20 mln dollar gazandy. Joşua hem şeýle tölege garaşyp biler.
