Türkmenistanyň halk suratkeşi, heýkeltaraş Babasary Annamyradow «Geljegiň mirasy» (“Келажак мероси”) halkara baýragy bilen sylaglanyldy. Baýragy gowşurmak dabarasy Daşkent şäherindäki Yslam medeniýetiniň merkezinde Özbegistanyň, Azerbaýjanyň, Gazagystanyň, Gyrgyz Respublikasynyň we Täjigistanyň Prezidentleriniň gatnaşmagynda geçirildi. Bu barada Özbegistanyň Prezidentiniň metbugat gullugy habar berýär.
Özbegistanyň Prezidentiniň Karary bilen esaslandyrylan bu halkara baýrak edebiýat, medeniýet, sungat, ylym, bilim hem-de sanly tehnologiýalar ulgamlarynda uly üstünlik gazanan ýerli we daşary ýurtly döredijilik işgärlerini höweslendirmäge gönükdirilendir.
Merkezi Aziýa ýurtlarynyň we Azerbaýjanyň wekilleri bäsleşigiň ilkinji ýeňijileri boldy:
- «Edebiýat» ugry boýunça - Türki medeniýetiň halkara guramasynyň (TÜRKSOÝ) Baş sekretary, Gyrgyzystanyň halk ýazyjysy Sultan Raýew;
- «Medeniýet» ugry - Täjigistanyň halk şahyry Dawlat Safarzoda;
- «Teatr we kino» ugry - M.Awezow adyndaky Gazak Milli drama teatrynyň aktýory Erkebulan Daýyrow;
- «Aýdym-saz we tans» ugry - Azerbaýjanyň halk artisti Alim Gasymow;
- «Bezeg we amaly-haşam sungaty» ugry - Türkmenistanyň halk suratkeşi Babasary Annamyradow;
- «Ylym, bilim we sanly tehnologiýalar» ugry - Özbegistanyň Oba hojalygy ministrliginiň ýanyndaky Halkara merkeziň direktorynyň orunbasary, oba hojalyk ylymlarynyň doktory Dilfuza Egamberdiýewa.
Halkara baýragyň laureatlaryna baýragyň statuetkasy, diplom we 10 müň amerikan dollary möçberindäki pul baýragy gowşuryldy.
Çärä gatnaşan Prezidentler halkara baýragyň eýeleri bilen bilelikde surata düşdüler.
