Nissan kompaniýasy ABŞ-da dokuzynjy nesil Sentra sedanynyň satuwyna başlady. Başga bazarlarda bu model Sylphy hökmünde bellidir.
Awtomobiliň daşky görnüşi doly täzelendi, interýer has döwrebap boldy, ýöne platforma we hereketlendiriji öňküligine galdy.
Täze ulag V şekilli radiator gözenegi, inçe yşyk diodly çyralary we brendiň soňky modellerine mahsus bolan sport stili bilen has dinamiki keşbe eýe boldy.
Salonda 12,3 dýuýmlyk merkezi ekran we 7 dýuýmlyk sanly enjam paneli bilen Nissan Connect multimedia ulgamy oturdyldy. Simsiz Apple CarPlay we Android Auto goldawy hem bar, tutuş optika bolsa yşyk diodlydyr.
Ulag S, SV, SR we SL ýaly dört wersiýada hödürlenýär, bahalar 23 645 dollardan 29 235 dollara ýetýär.
SL flagman görnüşi ProPilot Assist ulgamy, adaptiw kruiz-dolandyryş, intellektual tormoz ulgamy we töwerekleýin syn tehnologiýasy bilen enjamlaşdyryldy. Interýer romb görnüşli nagyşlar bilen TailorFit deri oturgyçlary we sekiz dinamikli Bose audioulgamy bilen tapawutlanýar.
Sentra-nyň ähli wersiýalary 149 at güýjüni berýän 2,0 litrlik benzin hereketlendirijisini aldy.
