Türkmenistanyň Döwlet migrasiýa gullugynyň wekilleri ýolagçy maglumatlaryny monitoringleşdirmegiň häzirki zaman ulgamlaryny ornaşdyrmaga bagyşlanan halkara duşuşyklaryna gatnaşdylar. Gündogar Ýewropa we Merkezi Aziýa üçin ýolagçy maglumatlary boýunça Resmi däl iş toparynyň bäşinji duşuşygy hem-de dokuzynjy bilelikdäki seminar 5–7-nji noýabr aralygynda Wenada geçirildi.
Çäräni ÝHHG-niň sekretariatynyň Milletara howplar boýunça departamenti hem-de BMG-niň Terrorçylyga garşy müdirligi gurnady.
Duşuşyklara gatnaşyjylar Ýolagçylar barada öňünden maglumat ulgamy (API) hem-de Ýolagçylaryň atlarynyň hasaba alyş ulgamy (PNR) boýunça tejribe alyşdylar. BMG Howpsuzlyk Geňeşiniň rezolýusiýalaryna laýyklykda döredilen bu ulgamlaryň maksady — mümkin bolan howplary ýüze çykarmak hem-de howply jenaýatçylaryň hereketlerini yzarlamak bolup durýar.
Türkmen wekiliýetiniň beren maglumatynda Migrasiýa gullugynyň maglumat ulgamlaryny kämilleşdirmek boýunça alnyp barylýan işleri beýan edildi. Şeýle hem halkara hünärmenleri bilen hyzmatdaşlygyň mümkinçilikleri — hünärmenleriň taýýarlygyny ýokarlandyrmakdan başlap tehniki goldaw almaga çenli — ara alnyp maslahatlaşyldy.
