RM Sotheby’s auksion öýi Formula-1 taryhynyň iň meşhur bolidleriniň biri bolan McLaren MP4/6 awtoulagyny auksiona çykarýar. Hut şu ulagda Aýrton Senna 1991-nji ýylyň Braziliýadaky Gran Prisinde, geçiriş gutusyndaky çynlakaý näsazlyklara garamazdan, ýeňiş gazanypdy.
Awtoulagyň bahasynyň 12–15 million dollar aralygynda bolmagyna garaşylýar.
1991-nji ýylyň Braziliýa Gran Prisi Sennanyň Interlagosdaky ilkinji ýeňşi boldy. Ýaryşyň tamamlanmagyna on aýlaw galanda, onuň bolidiniň geçiriş gutusynda näsazlyk döräp, sürüji diňe altynjy geçirişi ulanyp ýaryşy dowam etdirmäge mejbur boldy. Şol pursatda ýagyş hem başlapdy — Senna üçin adaty ýagdaý. Şonda-da ol soňky aýlawlarda garşydaşlaryndan öňe geçip, Rikkardo Patrezeden üç sekuntdanam az aratapawut bilen ýeňiş gazandy.
McLaren MP4/6 häzirki wagtda doly işjeň ýagdaýda auksiona çykarylýar. Ulag 3,5 litrlik V12 hereketlendirijisi (720 at güýji) hem-de işläp duran geçiriş gutusy bilen enjamlaşdyrylandyr. Bolid 2020-nji ýyla çenli McLaren kolleksiýasynda saklanyp, soň Lanzante kompaniýasy tarapyndan doly abatlandy. Auksiondan soň hem ulag tehniki barlagdan geçiriler.
Satyn alyjy bolid bilen birlikde ýaryş enjamlaryny we McLaren tarapyndan berlen hakykylyk sertifikatyny alar.
