Býujet barada ylalaşygyň gazanylmandygy sebäpli hökümet işiniň togtadylmagy netijesinde ABŞ-nyň uly howa menzillerinde gatnaw bökdençlikleri dowam edýär.
Reuters agentliginiň maglumatlaryna görä, diňe 8-nji noýabrda 1,5 müň töweregi gatnaw ýatyryldy we ýene 6 müňüsi gijikdirildi. Bir gün öň, 7-nji noýabrda müňden gowrak gatnaw ýatyryldy we 7 müň töweregi gatnaw gijikdirildi.
Gijikdirmeler ýurduň Atlanta, Nýuark, San-Fransisko, Çikago we Nýu-Ýork ýaly 12 uly şäherindäki howa menzillerine täsir etdi. Atlantada, dünýäniň iň köp hereketli howa menzilleriniň birinde, uçuşa garaşmagyň ortaça wagty tas bäş sagada ýetdi.
Federal raýat awiasiýa edarasy (FAA) awiakompaniýalara 7-nji noýabrdan başlap 40 uly howa menzilinde gündelik gatnawlaryň sanyny 4% azaltmagy tabşyrdy. 11-nji noýabra çenli azaltma 6%-e, 14-nji noýabra çenli 10%-e ýetmeli.
Şatdaun rekord 39 gün bäri dowam edýär. 13 müň töweregi awiadispetçer we 50 müň howpsuzlyk işgäri zähmet haksyz işleýär. Şol sebäpli dispetçerleriň 20 – 40%-i çalşyga çykanok. ABŞ-nyň ulag ministri Şon Daffi ýagdaý ýitileşmegini dowam etdirse, awiagatnawlary 20% azaltmaly boljakdygyny duýdurdy.
Senatda aglaba köplügiň lideri Jon Tun 8-nji noýabrda respublikanlar bilen demokratlaryň arasynda gepleşikleriň dowam edýändigini, ýöne entek ylalaşygyň gazanylmandygyny habar berdi. Senatyň nobatdaky mejlisi 9-njy noýabra meýilleşdirilýär.
Hasaplamalara görä, hökümet işiniň togtadylmagy ABŞ-nyň ykdysadyýetine her gün tas 2 mlrd dollar zyýan ýetirýär.
