Japan Mobility Show 2025 sergisinde Nissan kompaniýasy Elgrand miniweniniň köpden bäri garaşylan dördünji neslini hödürledi. Modeliň premýerasy forumyň iň esasy wakalarynyň biri boldy. Modeliň bazara 2026-njy ýylyň tomsunda çykmagyna garaşylýar diýip, Carscoops habar berýär.
Täze Elgrand awtoulaga döwrebap we futuristik keşbi berýän Timeless Japanese Futurism stilinde ýerine ýetirildi. Awtomobiliň eksterýeri doly gaýtadan işlendi we 2010-njy ýyldan bäri çykarylýan öňki wersiýa bilen meňzeşligi ýok diýen ýaly.
Öň bölegi kiçijik yşyk diodlary bolan pikselli radiator gözenegi, şeýle-de kuzowyň gara we boýalan panelleriniň sazlaşmagy bilen tapawutlanýar. Yzky bölek hem özboluşly täsin: çylşyrymly LED zolaklary we bagaž ýeriniň gapysynyň pahnapisint şekili innowasion dizaýny görkezýär.
Interýer hem üýtgedildi. Salon ýolagçylar üçin has rahat boldy: fiziki düwmeli iki reňkli deri ruly, iki sany 14,3 dýuýmlyk panel we täzelenen merkezi konsol döwrebap atmosferany döredýär. 22 dinamikli Bose audioulgamy sesiň ýokary hilli ýaňlanmagyny üpjün edýär. Ikinji hatarda hemmetaraplaýyn rahat bolan “kapitan” oturgyçlary oturdyldy.
Kapotyň aşagynda 1,5 litrlik turbinaly benzin hereketlendirijisi bilen elektrik hereketlendirijisini birleşdirýän üçünji nesil e-POWER gibrid enjamy bar. Bu wersiýa täzelenen e-4ORCE ulgamy – intellektual doly herekete getiriji bilen üpjün edildi. Ol bat alyşda we tormozda hereketiň saz bolmagyna mümkinçilik berýär.
Täze Elgrand 50 km/sag çenli tizlikde eliň kömegi bolmazdan hereketi goldaýan ProPILOT ulgamyny aldy, iň ýokary wersiýa bolsa zolaklary awtomatik çalyşmak we şosse boýunça awtonom hereket etmek funksiýasy bilen ProPILOT 2.0 ulgamyna eýe boldy.
Ýapon bazarynda Elgrand ulagy Toyota Vellfire (Alphard miniweniniň ýerli görnüşi) üçin esasy bäsdeş bolar.
