Emeli aň mahabat wideolaryny döretmek üçin işjeň ulanylyp başlandy we olar eýýäm sosial ulgamlarda hem telewideniýede görkezilýär. Olaryň önümçiligi üçin OpenAI Sora we Google Veo 3 ýaly kuwwatly modeller ulanylýar. Bu gezek Google hem öz tehnologiýasyndan peýdalanmak kararyna geldi we ilkinji gezek doly EA bilen döredilen mahabat wideosyny hödürledi diýip, Wall Street Journal habar berýär.
Wideonyň esasy gahrymany ýumşak görnüşli hindi towugy boldy. Ol Google gözleg ulgamyny açyp, EA režimini işjeňleşdirýär we fermadan gaçyp, Minnetdarlyk gününiň bellenmeýän ýerine gitmek isleýär – çünki ABŞ-da bu baýramçylykda, adatça, hindi towugy bişirilýär. Wideo telewideniýede, kinoteatrlarda, sosial ulgamlarda we dürli internet platformalarynda görkezilip başlandy. Geljekde kompaniýa Roždestwo üçin ýene bir wideo çykarmagy meýilleşdirýär.
Veo 3 wideo generatory eýýäm Ritual, Coign we Kalshi ýaly beýleki kompaniýalar tarapyndan ulanyldy. Google Creative Lab-yň marketing bölüminiň ýolbaşçysy Robert Won wideoda EA-nyň ulanylandygynyň ýörite bellenmändigini aýtdy. Maksat möwsümleýin nostalgiýa atmosferasyny döredip, tomaşaçylaryň çagalykda gören gepleşikleriniň ýa-da multfilmleriniň baýramçylyk sanlaryny ýatlatmakdy.
Mahabat EA tarapyndan döredilen hem bolsa, marketing biznesini awtomatizirlemekden entek ir. Çünki EA generatorlary häzirem adam keşplerini, köplenç, has “emeli” edýär.
Google, esasan, Veo 3-i wideolaryň garalama nusgalary üçin ulanýar. Ol soňra aktýorlar, režissýorlar we prodýuserler tarapyndan kämilleşdirilýär. Wonuň aýtmagyna görä, wagtyň geçmegi bilen EA Adobe Photoshop ýaly adaty bir gurala öwrülip bilner.
