PepsiCo soňky 25 ýylyň içinde ilkinji gezek logotipini we firma stilini täzeledi. Täze şygar hem-de dizaýn eýýäm kompaniýanyň resmi saýtynda ýerleşdirildi. Indi brendiň täze şygary şeýle ýaňlanýar: «Iýmit. Içgiler. Ýylgyryşlar».
Kompaniýanyň baş direktory Ramon Laguarta täze wizual keşbiň brendde bolup geçýän üýtgeşmeleri alamatlandyrýandygyny, onuň energiýasyny, optimizmini we täze maksatlardaky hyjuwyny görkezýändigini belledi.
Täze logotipiň esasy merkezi elementi – dürli grafiki nyşanlar bilen gurşalan «P» harpy. Kompaniýanyň maglumatyna görä, bu nyşanlar müşderä üns bermegi, durnukly ösüşe bolan ygrarlylygy we brendiň özüne mahsus tagam duýgusyny aňladýar.
Dizaýnda şeýle hem ýylgyrşyň şekili ulanyldy. Bu brendiň «her owurtda we her dişlemde has köp ýylgyryş paýlaşmak» baradaky maksadyna laýyk gelýän wizual alamatdyr. Täze korporatiw şrift setir harplardan durýar we «elýeterlilik we ýakynlyk duýgusyny» döretmek üçin saýlanypdyr. Reňk palitrasy bolsa «hasylly topraklardan» hem-de PepsiCo içgileriniň tebigy reňklerinden ylham alýar.
