2024-nji ýylda dünýäde dollar milliarderleriniň sany 5,6% artyp, 3508 adama ýetdi – bu 2020-nji ýyldan bäri iň uly ösüş boldy. Olaryň umumy baýlygy 10,3% artyp, görlüp-eşidilmedik 13,4 trln dollara ýetdi. Şeýle maglumatlar Altrata gözleg kompaniýasy tarapyndan taýýarlanan Billionaire Census 2025 ýyllyk hasabatyndan gelip çykýar.
Milliarderleriň sany boýunça öňdebaryjy Demirgazyk Amerika bolup galýar – iň baý adamlaryň 34,2%-i we umumy baýlygyň 44%-i onuň paýyna düşýär. Ikinji orunda Ýewropa (milliarderleriň 28,6%-i we umumy kapitalyň 24,4%-i), üçünji orunda Aziýa (degişlilikde, 23,6% we 20,8%) ýerleşýär.
Aýry-aýry ýurtlaryň arasynda birinji orny ABŞ eýeleýär – 5,7 trln dollar baýlyk bilen 1135 milliarder. Onuň yzyndan Hytaý (321 milliarder, 1,28 trln dollar) we Germaniýa (170, 703 mlrd dollar) gelýär.
2024-nji ýylda milliarderleriň iň köp jemlenen şäherleri Nýu-Ýork, Gonkong we San-Fransisko boldy.
Altrata analitikleri baýlygy 50 mlrd dollardan geçýän iň barly 26 milliarderiň umumy kapitalyň 21%-ini emele getirýändigini we munuň bir ýyl ozalkydan 4% köpdügini belleýär.
Mundan başga-da, kompaniýa 2025-nji ýylyň iýunyna çenli ýagdaýa görä, dünýäde multimillionerleriň (baýlygy 30 mln dollardan ýokary bolan) sanynyň ýylyň başyndan bäri 5,4% köpelip, 510,8 müň adama ýetendigini habar berdi. Olaryň umumy baýlygy 59,8 trln dollar diýlip hasaplanýar.
