Tokioda Japan Mobility Show sergisinde Lexus kompaniýasy LS indeksli üç täze tejribeli konsept modelini görkezdi. Häzir bu at marka üçin flagman sedana degişli bolsa-da, onuň öndüriliş döwri tamamlanmaga ýakyn gelýär. Täze görkezilen konseptlerden çen tutulsa, geljekde LS aýratyn model hataryna öwrülip biler.
LS Concept — kaşaň miniwen
Sergide esasy üns çeken ulag — alty tekerli LS Concept miniweni. Bu, mümkin, Lexus tarapyndan häzire çenli döredilen iň iri modeldir. Ulagyň futuristik görnüşi giň ön aýna, iki bölekden ybarat panaramaly ýagtylandyrylan üçek we ikinji hem-de üçünji hatar oturgyçlarynyň penjirelerinde ýerleşdirilen aýratyn «žalýuz» görnüşindäki çözgütler bilen tapawutlanýar. Yza ýerleşdirilen dört teker öňki tekerlerden kiçidir.
Salonda şturwal görnüşli dolandyryş rul, birnäçe ekrandan ybarat sanly panel ýerleşdirilen. Ikinji hatarda ýatyryp bolýan diwan, üçünji hataryň bezegi bolsa ýörite «business-class» hususy uçarynyň äheňinde ýerine ýetirilipdir.
LS Coupe — kämil görnüşli kross-kupe
Ikinji konsept — LS Coupe, sport kupesiniň we krossoweriň aýratynlyklaryny birleşdirýär. Yzky gapylar hereket ugrunyň tersine açylýar, bagaž bölegi bolsa çekilip çykýan guty görnüşinde ýerine ýetirilen. Salon arhitekturasy boýunça LS Concept miniwenine meňzeş, içki bezegde agaç ulanylypdyr. Öňdäki oturgyçlaryň arka bölegine ýolagçylar üçin dik monitorler ornaşdyrylan.
LS Micro — megapolise niýetlenen bir adamlyk awtonom elektrokar
Üçünji konsept — LS Micro, doly awtonom dolandyryşa eýe bolan bir adamlyk kiçi elektromobil. Salona ulagyň öňki bölegi ýokary galdyrylyp girilýär, şol bölege açyk displeý hem ornaşdyrylan. Içi diňe bir oturgyçdan, içgi goýmak üçin ýerden we funksional dolandyryş üçin joýstikler bilen enjamlaşdyrylan panellerden ybarat.
