28-nji oktýabrda, sişenbe güni Türkmenistanyň «Altyn Asyr» futbol kluby AFK-nyň Çagyryş Ligasyndaky toparlaýyn tapgyryň ikinji duşuşygynda Butanyň «Paro» klubuny 3:1 hasabynda utdy. Ýaryşyň Günbatar zolagynyň "A" toparynyň ähli duşuşyklary merkezleşdirilen formatda Butanyň paýtagty Thimphuda geçirilýär.
Duşuşygyň 9-njy minutynda «Altyn Asyryň» oýunçysy Rahman Myratberdiýew hasaby açdy. Alty minut soň «Paro» Rikui Içimuranyň goly bilen hasaby deňledi. 37-nji minutda R.Myratberdiýew dubl edip, toparyny ýene öňe çykardy.
Duşuşygyň jemleýji hasabyny 73-nji minutda Resul Röwşenmyradow uzakdan owadan urgusy bilen goýdy — 3:1.
Toparyň beýleki oýnunda Omanyň «Al-Şabab» topary Gyrgyzystanyň «Abdyş-Ata» toparyny 2:1 hasabynda utdy.
Iki tapgyrdan soň «Altyn Asyr» 6 utuk bilen toparyň başyny çekýär. Birinji duşuşygynda Ýazguly Hojageldiýewiň şägirtleri «Abdyş-Atany» 1:0 hasabynda utdy. «Al-Şabab» toparynda hem 6 utuk bar, emma oman topary gol tapawudy boýunça «Altyn Asyrdan» yzdan. Birinji orny gutarnykly kesgitlejek duşuşyk 31-nji oktýabrda «Altyn Asyr» bilen «Al-Şabab» toparlarynyň arasynda geçiriler. Oýun Aşgabat wagty bilen 17:00-da başlanar.
«Paro» hem-de «Abdyş-Ata» asla utuk gazanyp bilmän, pleý-offa çykmak mümkinçiliklerini ýitirdiler.
2025/26 möwsüminde AFK Çagyryş Ligasyna 20 klub gatnaşýar. Olar Günbatar we Gündogar zolaga bölünen toparlarda çykyş edýärler. Duşuşyklar merkezleşdirilen formatda geçirilýär we toparlaryň hersi garşydaşlary bilen bir gezekden duşuşýar.
Çärýek finala Günbatar zolagyndan üç toparyň ýeňijisi we iň gowy ikinji ýer eýesi, şeýle hem Gündogar zolagyndan her topar boýunça iki topar çykar. Çärýek final — 2026-njy ýylyň mart aýynda, ýarym final — aprel aýynda, final oýny bolsa 2026-njy ýylyň 9-njy maýynda bolar.
