Toyota kompaniýasy Beýik Britaniýadaky zawodynda ýygnalan Hilux Fuel Cell atly wodorod bilen işleýän pikap awtoulagyny tanyşdyrdy. Jemi on sany prototip öndürildi, olaryň bäşisi eýýäm synagdan geçýär.
Awtoulagyň gurluşy üç sany gysylan wodorod ballony bilen enjamlaşdyrylandyr, bu bolsa oňa 600 kilometre çenli aralyk geçmäge mümkinçilik berýär.
Kuwwat ulgamy Toyota Mirai sedanyndan alnyp, polimer membranaly ýangyç elementlerinden hem-de yzky okda ýerleşýän 180 at güýjündäki elektrik hereketlendirijisinden düzülýär. Ýük bölüminiň içindäki litiý-ion akkumulýatory energiýany dikeldýär we awtoulagyň tizligini artdyrmaga kömek edýär.
Hilux Fuel Cell ýokary ýük göterijilik ukybyny saklaýar we zyýanly gaz zyňyndylaryny çykarmazdan tirkegi çekip bilýär. Toyota bu modeli uglerod bitaraplygyna tarap möhüm ädim hökmünde görýär we awtoulag sporty ulgamynda wodorod hereketlendirijilerini hem-de ýangyç elementlerini barlap görmegini dowam etdirýär.
Bu pikap 2026-njy ýylda çykaryljak iň möhüm täze modelleriň biri bolup biler we täjirçilik ulaglarynda wodorod tehnologiýasynyň amaly ulanylyşyny görkezýär.
