Täze Zelandiýada üç fotosuratçy seýrek tebigy hadysany – “gyzyl spraýt” ýyldyrymyny surata düşürdi. Gyrmyzy reňkli öwüşginler adanyň asmanynda 11-nji oktýabrda peýda boldy diýip, The Guardian habar berýär.
Fotosuratçy Tom Reý ispaniýaly kärdeşleri Dan Zafra we Hose Kantabrana bilen bilelikde Omaramanyň toýun gaýalarynyň üstünde Akmaýanyň ýoluny surata düşürmegi meýilleşdiripdi. Ýöne ýyldyzly asmanyň deregine olar amosferanyň ýokarky gatlaklarynda üýtgeşik elektrik razrýadlaryny surata aldy. Kantabrana gözýetimde tupany görüp, “gyzyl spraýtlaryň” bolup biljekdigini çaklady. Soňra ol suratlary barlan mahaly, hakykatdanda, bu ýyldyrymlaryň bardygyny gördi.
“Gyzyl spraýtlar” – bu tupan bulutlarynyň üstünde ýüze çykýan gysga elektrik razrýadlar. Ýere gönükdirilen adaty ýyldyrymlardan tapawutlylykda, bu ýyldyrymlar sütün ýa-da meduza ýaly şekillere eýe bolup, ýokaryk ymtylýar. Ilkinji gezek olary 1989-njy ýylda Minnesota uniwersitetiniň alymlaryna tötänleýin surata düşürmek başartdy.
Hadysa bir sekuntdan hem az dowam edýär, şonuň üçin ony adaty göz bilen görmek mümkin däl. Reýiň özüne öwüşginleriň birini görmek başartdy. Onuň aýtmagyna görä, “gyzyl spraýtlara” syn etmek onuň köpden bäri arzuwydy.
Fotosuratçylar bu kadrlaryň bir wagtyň özünde günorta ýarym şarda “gyzyl spraýtlary” we Akmaýanyň ýoluny görkezýän ilkinji kadrlar bolup biljekdigini aýdýar.
