Täze Zelandiýada Günorta adanyň kenaryna dünýäde kitleriň iň seýrek görnüşi bolan günorta amerikan remnezuby öýdülýän kitiň läşi zyňlyp kenara çykdy. Onuň uzynlygy, takmynan, 5 metr. Phys.org-yň habar bermegine görä, hünärmenler ony reňkinden, kellesiniň şekilinden, burnundan we dişlerinden tanap kesgitlediler.
Alymlaryň taryhda ilkinji gezek bu görnüşi jikme-jiklik bilen öwrenmäge mümkinçiligi bolar. Ondan öň Günorta Amerika remnezubyndan diňe alty sanysy tapylypdy we olaryň hemmesi barlag geçirilmezden jaýlandy. Bu gezek süýdemdiriji sowadyjy kamera äkidildi.
Barlag kitiň beýleki görnüşler bilen garyndaşlygy, iýmitlenişi we ýaşaýan gurşawy barada has köp zat bilmäge mümkinçilik berer diýip alymlar umyt edýärler.
Kitiň aslyny tassyklamak üçin geçiriljek genetiki synag birnäçe aý dowam edip biler.
Günorta Ýuwaş ummanynda ýaşaýan günorta amerikan remnezublary örän az öwrenilen haýwanlardyr. Olaryň iýmit gözleginde juda uly çuňluklara çümüp, suwuň ýüzüne gaty seýrek ýagdaýlarda çykýandyklary mälimdir.
Täze Zelandiýa kitleriň kenara köp zyňlyp çykýan nokady hasaplanýar. 1840-njy ýyldan bäri şeýle wakalaryň 5000-den gowragy hasaba alyndy.
