NASA-nyň Landsat 8 hemrasy Täze Zelandiýanyň Günorta adasynda seýrek duş gelýän tebigy hadysany - lentikulýar (linza görnüşli) buludy surata düşürdi diýip, Naked Science ýazýar.
Bulut 2024-nji ýylyň 7-nji sentýabrynda Otago sebitinde emele gelen wagty surata düşürildi.
Lentikulýar bulutlar gaty seýrek hadysadyr. Olar, güýçli şemallar dag gerişleri ýaly päsgelçiliklere duş gelenlerinde howa tolkunlarynda ýa-da howa gatlaklarynyň arasynda emele gelýärler. Şeýle şertlerde howa ýokary galmaga mejbur bolup, atmosfera tolkunyny döredýär. Howadaky suw buglary, howa tolkunynda sowap, bulutlaryň emele gelmegine sebäp bolýar.
Bulut bu howa tolkunynda emele gelýän wagty, asmanda hereketsiz galýar we üstünden öwüsýän güýçli şemallaryň kömegi bilen formirlenýär.
