Microsoft operasion ulgamynyň 40 ýyllygynyň şanyna Windows 11 üçin uly emeli aň täzelenmesini taýýarlaýar. Täze mümkinçilikler diňe Copilot Plus kompýuterlerinde däl, eýsem ähli goldanylýan enjamlarda elýeterli bolar diýip, The Verge habar berýär.
Indi ulanyjylar kompýuterini diňe ses arkaly dolandyrmaga we AI-e — adamyň goşulyşmazdan — çylşyrymly meseleleri ýerine ýetirmegi tabşyrmaga mümkinçilik alarlar.
«Hey, Copilot!» buýrugy bilen dolandyryň
Ses dolandyryşy “Salam, Copilot!” (“Hey, Copilot!”) diýen buýruk arkaly işjeňleşdirilýär. Microsoft-yň ýerine ýetiriji wise-prezidenti Ýusuf Mehdiniň bellemegine görä, ses dolandyryşy kompýuter bilen aragatnaşygyň täze görnüşi bolar:
“Ol hökman klawiaturanyň we syçanjygyň ornuny tutmaz, ýöne möhüm goşmaça funksiýa öwrüler”.
Copilot Vision — ekrandaky hereketleri yzarlamak üçin
AI-niň ekranda bolup geçýän zatlary görüp bilmegi üçin ulanyjy oňa rugsat bermeli. Muny üpjün edýän Copilot Vision hyzmaty soňky aýlarda synagdan geçdi we häzirki wagtda Copilot elýeterli ähli ýurtlarda işleýär.
Copilot Vision programmalary açmaga, näsazlyklary çözmäge, täze aýratynlyklary öwrenmäge hatda oýun oýnamaga-da kömek edýär. Ol üznüksiz işleýän Recall funksiýasyndan tapawutlylykda, diňe zerur bolan mahaly işjeňleşýär.
Copilot Actions — AI indi hereket eder
Indiki ädim — Copilot Actions, AI-e kompýuterde hereket etmäge mümkinçilik berer. Ilkibaşda bu mümkinçilik çäkli bolar we diňe Copilot Labs programma gatnaşyjylaryna açylar, sebäbi täze agentiň çylşyrymly işleri ýerine ýetirende ýalňyşlyk goýbermegi ähtimal.
Täze gözleg ulgamy we bir basyşda elýeterlik
Copilot Windows-nyň wezipeler paneline birleşdiriler — bir gezek basmak bilen Copilot Vision we Voice funksiýalaryny açmak mümkin bolar. Şeýle hem, täze gözleg ulgamy ýerli faýllary, programmalary we sazlamalary has çalt tapmaga mümkinçilik berer.
