Boliwiýanyň Prezidentiniň saýlawlarynda Hristian-demokratik partiýadan (PDC) dalaşgär Rodrigo Pas ýeňiş gazandy diýip, El País habar berýär. Ol 54,5% ses gazandy, onuň garşydaşy, ýurduň öňki Prezidenti, Libre bileleşigine wekilçilik edýän Horhe Kiroga bolsa 45,5% ses aldy.
Pas prezidentlige ilkinji gezek dalaş etdi. Ol 8-nji noýabrda resmi taýdan wezipä girişer. Neşiriň maglumatlaryna görä, onuň ýeňşi ýurduň öňki Prezidenti Ewo Morales (2006-2019) bilen baglanyşykly çepçi güýçleriň agalyk döwrüniň tamamlanandygyny aňladýar. Täze döwlet Baştutany “hemmeler üçin kapitalizm” ýörelgesine esaslanýan syýasaty alyp barmagy maksat edinýär. Ol işewürligiň ösüşine päsgel berýän administratiw päsgelçilikleri aradan aýyrmaga wada berdi.
Saýlawdan öňki kampaniýada Kiroga Halkara pul gaznasy bilen hyzmatdaşlyk etmek ugrunda we ýangyç üçin döwlet maliýe goldawyny ýatyrmak ugrunda çykyş etdi. Ol muny ýetmezçilik meselesini çözmäge tarap ädim diýip hasaplaýar. Ýöne, El País-iň belleýşi ýaly, şeýle çäreler bahalaryň ýokarlanmagyna getirip bilerdi.
Awgustyň ahyrynda Kiroga ýeňiş gazanan ýagdaýynda litiý gazyp almak boýunça Hytaý we Russiýa bilen köp milliardlyk şertnamalary ýatyrmakçydygyny aýdypdy. Ol Boliwiýanyň daşary syýasy ugruny üýtgetmäge çagyrdy. Kiroga muny dünýäde iň uly litiý ätiýaçlyklaryna – takmynan, 23 mln tonna eýe bolan ýurt üçin zerur hasaplaýar.
Boliwiýanyň litisiniň geljegi baradaky sorag saýlawdan öňki kampaniýanyň merkezi mowzuklarynyň biri boldy.
