Samsung kompaniýasy eplenýän smartfonlaryň berkligini we hyzmat ediş möhletini ýokarlandyrmaga ukyply täze tehnologiýany patentledi. Ulgamyň özeni mikroskopik simleriň we “sensor halkasy” diýlip atlandyrylýan datçikleriň utgaşmasyndan ybarat.
Soňky ýyllarda eplenýän enjamlary öndürijiler bir mesele bilen ýüzbe-ýüz bolýarlar — kameralary we barmak yz skanerlerini gurluşyny gowşatmazdan çeýe displeýe nädip birleşdirmeli? Bu komponentler üçin edilen ownuk deşikler köplenç mikrojaýryklaryň döremegine sebäp bolup, displeýiň zyýan çekmegine ýol açýardy. Şol sebäpli Galaxy Z seriýasynda barmak yz skanerleri häzirem gapdal panelde ýerleşýär.
Neşir edilen patente görä, Samsung bu meseläni çözmek üçin kameralar we skanerler üçin howpsuzlyk ulgamyny göni ekrana ornaşdyrmagy meýilleşdirýär. Ultra inçe geçirijilerden düzülen “sensor halkasy” displeýiň ýagdaýyna yzygiderli gözegçilik edýär we hatda ownuk kemçilikleri hem derrew anyklaýar.
Eger ulgam mümkin bolan zyýany ýüze çykarýan bolsa, ol öz-özüni dikeltmek prosesini işjeňleşdirýär. Ýörite metal mikromatrisalar gowşak ýerleri awtomatiki jebisleýär we jaýryklaryň giňelmeginiň öňüni alýan, göze ilmezek diýen ýaly “çukurlary” döredýär.
Mundan başga-da, gurluşda OLED gatlaklaryny çyglylykdan we kisloroddan goraýan ýörite kanallar hem-de jebisleýjiler bar.
Şu wagt bu diňe patent derejesinde bolup, tehnologiýanyň ýakyn wagtda çykjak Galaxy Z Fold ýa-da Z Flip ýaly önümçilik enjamlarynda peýda boljakdygy entek tassyklanmady.
