Iň ýeňil agramda UFC-niň öňki çempiony, russiýaly Pýotr Ýan ýene-de tituly gaýdyp almak mümkinçiligine eýe bolar. Ol 6-njy dekabrda (Aşgabat wagty bilen 7-nji dekabra geçilýän gije) UFC-niň häzirki çempiony, gruziýaly Merab Dwalişwili bilen duşuşar. Söweş Las-Wegasda geçiriljek UFC 323 ýaryşynyň esasy wakasy bolar. Tutluşyk barada guramanyň prezidenti Dana Uaýt resmi taýdan habar berdi.
Dwalişwili üçin bu söweş rekord goýmaga mümkinçilikdir: ýeňiş gazanan ýagdaýynda bu onuň bir senenama ýylynda guşagyny dördünji gezek goradygy bolar.
Ýan bilen Dwalişwili eýýäm 2023-nji ýylyň martynda oktagonda duşuşypdy. Şonda emin agzalarynyň biragyzdan karar bermeginde Dwalişwili ýeňiş gazandy.
