Nissan kompaniýasy täze ykjam Tekton krossoweriniň ilkinji suratlaryny köpçülige görkezdi. Bu model hindi bazary üçin ýörite döredilip, 2026-njy ýylda satuwa çykarylar, soň bolsa beýleki ýurtlaryň bazarlarynda hem peýda bolar.
Resmi maglumatlara görä, täze ulagyň dizaýny uly Nissan Patrol ulagyndan ylham alýar. Şol bir wagtda-da, Carscoops neşiri Tektonyň meşhur Dacia Duster krossoweriniň täzeden işlenip düzülen görnüşidigini belleýär.
Modeliň ady grek dilindäki “tekton” sözünden gelip çykýar we “senetçi” ýa-da “gurluşykçy” manysyny berýär. Krossoweriň öň tarapy C görnüşindäki LED faralar we hrom elementleri bolan radiator gözenegi bilen bezelendir. Kapot Duster modeliniň şekilini saklaýar, emma has relýefli görnüşdedir. Profil taýdan hem Duster-e meňzeýär, yzky yşyklary bolsa Patrol stilinde ýerine ýetirilen.
Tektonyň uzynlygy takmynan 4,3 metr. Ol Dacia, Renault, Mitsubishi we Nissan modellerinde ulanylýan CMF-B platformasynda guruldy.
Motory barada jikme-jik maglumat entek mälim edilmedi. Şeýle-de bolsa, Tektonyň 1,0 we 1,3 litrlik turbo hereketlendirijiler bilen enjamlaşdyrylmagyna garaşylýar — bu hereketlendirijiler Duster-de hem ulanylýar.
