Visualcapitalist portaly iň köp milliarder uçurymly uniwersitetleriň täze infografikasyny hödürledi. Reýtinge görä, maliýe taýdan üstünlik gazanan uçurymlaryň aglabasy ABŞ-nyň ýokary okuw mekdeplerinden çykýar, ýöne Aziýanyň institutlarynyň ornunyň hem yzygiderli ýokarlanýandygy aýdyň görünýär.
Birinjiligi Harward uniwersiteti eýeleýär — onuň uçurymlary umumylykda 600 milliard dollara golaý baýlyga eýe. Üstesine, bu sanawda Harwardyň meşhur, ýöne okuwyny doly tamamlamadyk talyplary, mysal üçin, Bil Geýts we Mark Sukerberg hasaba alynmandyr.
Stenford uniwersiteti, Kremniý jülgesi bilen ýakyn gatnaşyklary sebäpli, Jerri Ýang (Yahoo) we Endy Fang (DoorDash) ýaly üstünlikli telekeçileri taýýarlapdyr. Pensilwaniýa uniwersiteti — Ilon Maskyň, Kolumbiýa uniwersiteti bolsa Uorren Baffetiň (Berkshire Hathaway) bilim alan ýeridir. Massaçusets Tehnologiýa Instituty (MIT) bolsa tehnologiýa we senagat liderlerini, şol sanda Koch Industries-dan Çarlz Kohy taýýarlady.
Ilkinji 20-likde Aziýanyň birnäçe uniwersiteti hem bar — Mumbaý uniwersiteti, Sinhua uniwersiteti, Pekin uniwersiteti we Seulyň milli uniwersiteti. Mysal üçin, Pekin uniwersiteti Baidu-niň esaslandyryjysy Robin Liýni, Mumbaý uniwersiteti bolsa Reliance Industries-nyň ýolbaşçysy Mukeş Ambanini çykardy. Russiýanyň ýokary okuw mekdeplerinden bolsa öňde M.W. Lomonosow adyndaky Moskwa döwlet uniwersiteti bar — onuň 13 uçurymy milliarder hasaplanýar.
